منى أحمد
كل نهار بتهل مصايب
كل حكاية بنجري وراها
أما حكاية أم قويق
خلت عقلنا تاه وياها
أم قويق قتلت عيلها
طبخت راسه ف قلب الحله
وإزاي تعمل كدا في ضناها ؟
وتخلينا ف زيت نتقلى ؟
قالوا عليها دي لازم إتجنت
كشفوا العقل لقوها سليمه
طيب إيه السر ياعالم ؟
أي مبرر مالهوش قيمه
قالت خوفت عليه م الدنيا
دنيا وابور وداستني معاها
فيها الظلم كمان متوفر
وخدتني ف زحمة خباياها
إبني ضنايا انا أولى بأكله
قبل ديابة الدنيا ماتاكله
تاكلي ضناكي وفلذة كبدك ؟
إزاي بس يطاوعك قلبك ؟
إنتي ف دنيا ولا ف غابه ؟
والله دا فعلك فعل ديابه
حتى الديب يستحي يعملها
قلبه ضعيف مابيتحملها
خايفه ازاي وفي رب فوقيه ؟
خلق الرزق كمان تحتيه
إوعي تقولي إنك مظلومه
دي أمومه اتعدمت مع بومه
أصله مبرر محتاج شفرة
علشان يبقى طبيخ ع السفرة
