كتب
جلال محمد
بيدخل كلية الهندسه ,حتي لو بالفلوس ، بيغير حياته 180 درجه ويحط حرف ال Eng جمب اسم الاكونت وابوه يجيب ميكروفون ويقول المهندس راح المهندس جه وماينفعش تنده بأسمه او تقوله استاذ كذا لا لازم تقولو يابشمهندس , بس هما احرار…!
_بتدخل كلية الطب , بتخسر كل أصحابك اللى دخلو كليات متوسطه حتى لو تعرفهم من ابتدائى وبتبدأ تتعرف على ناس يكونو من نفس مستواها, بس هو حر…!
_بمجرد دخوله الكلية الحربيه او كلية الشرطة , مناخيره بتترفع لفوق تلقائيا , ومش هو لوحده ده عيلته كلها بتغير اساميها , واى حد ليه علاقه بيه بيغير اسمه , صاحب الظابط , ابن عم الظابط , حبيبة الظابط , اخت الظابط , حظااااااابط…!
_طالب تجاره انجلش انت ممكن تقوله انت عندك عقم مابتخلفش وممكن يتقبل الموضوع ولا انك تقارنه بطالب تجاره عربى نهائى , هتلاقى قنبله شتايم خرجت في وشك ليه يابن الناس تقارنه بواحد بيدفع 750 جنيه فى السنه وهو بيدفع 10000 لمجرد ان ال بيدرسه بالانجلش هناك بيدرسه بالعربى , بس لا انت عايز تقارنى بواحد الفرق بينى وبينه 40 الف جنيه ! مايجبوش تمن عربيه 128…
_بلد 90% من اهلها ماشين بمبدأ بنتنا ماتتجوزش الا مهندس او دكتور , المهندس للمهندسه والدكتور للدكتورة والدكتورة ماتاخدش اقل من مهندس او دكتور او ظابط شرطه , وفى عائلات مابياخدوش غير ظباط جيش , اه والله , وفى عائلات مابتدخلش حد بينها الا اذا كان مهندس عشان يبقا اسمهم عيلة المهندسيـن وماحدش يضيع شرف العيله…!
_ال معاه ايفون بيشوف نفسه على ال معاه سامسونج , ال بيجيب بنطلون جامد بيتصور بيه 100 صورة ولمده شهر يفضل يتصل بصحابه :- اى يازميلى مش انا جبت بنطلون من زارااااا اه والله زى مابقولك تعالا يلا نخربها فى وسط البلد…!
_بتجيب قلم روج من ماك ولا كوتش من Nike ويجى عليه شوية تراب ماتشوفهمش الا بالعين المجرده فا تروح تكتب ع الفيس ياريت الناس ال مركزة فى حياتى تكون مبسوطه دلوقتى…!
_اول مابيخطب بيبدأ يعتزل صحابه ويختفى عنهم و لو قعد معاهم مرة يحسسهم انه العاقل الوحيد والناضج الأوحد
_اول ما بتتخطب تفضل تتكلم بأديها كتير
وكل ما تكلم صحباتها تقلهم خطيبى راح خطيبى جه
وكأنها مخطوبة لـ ظافر عابدين…
_انتوا من اول مابتصحوا لحد مابتناموا بتفطروا وتتغدوا وتتعشوا عنصرية , انتوا اكتر شعب بيعشق الماديات وبيعشق ان يكون ليه نفوذ وسلطه…
