يااااه ع الأيام..
والحُب زمان
وقُلوب الناس المليانه
طِيبه و حنان
ياااااه ع الأيام…
كل اما بنمشي ف شوارعها
ونركز فيها وملامحها
تمتعنا جِداً روايحها
وكأنها كانت ف الأحلااام
يااااه ع الأيام…..
الخير كان مالي بُيوتنا
وكان مالي إيدينا
والرضا كان عالي أوي ف صُوتنا
وباين ف عنينا
طب ايه اللي جرالنا ياخونا
آه ياعيني علينا
الحُب وصِدقُه وأحاسيسُه
بقى ف الأفلام..
يااه ع الأيام…
الخير كان داير
جاي رايح
م البيت للبيت يتنقَّل
دايماً ف بُيوتنا
كان فايح
وبلمة ناسنا متبَّل
ونِدانا لكُل غريب وقريب
على طبليتنا إتفضّل
وغِنانا كان جوانا…
وكُنا مع جيرانا تمام….
ياااااه ع الأيام….
ريحة الأحباب
دُخان لا فران
والبيت عمران بالوِد
أطفال وشباب
وكبير متصان
بأصول وأدب ف الرد
والجار للجار
حُب وعرفان
وتوقير للخال والجَد
والعم سند والأخ آمااان
وقت الأيام ما تشِد
وبساطه وعطف وحنيه
مع خير وسلام
يااااه ع الأيام
