أحمد التبيني
مادام بايعِني أحبابى
ناويت أعمل مزاد علنى
ياجوز الاقى ف أصحابى
واحد شارى يشيل عنى
يعوضنى بحنان جارف..
حنبدأ يالا على شاعر
انا الشاعر بعيد عنكوا
عشان حقانى ..مش نافع
صاحب مبدأ من الأخر
لابيطبل ولا ينافق
وحس بناس مابتحسش
وحُبه ماكانش له شافع
بيعشق قلبه كل الناس
وينصح ناس مايعرفهمش
وناس ع الصدق عارفينه
شاعر فقرى غِناه الإحساس
وبرضه لفقره حاسدينه
تقول صعلوك تقول طيب
تقول ال ايه..على نياته
لكن شاعر
والشعر كان كل حياته
جى النهاردة عشان يتباع
على الأقل يجيب حاجه
ماهو ياما إتباع
من غير ماياخد ولا حاجه
مين فيكوا شارى..
وأساوى أنا كام
مين حس بيا وبعذابى
وللا انتوا جايين للشادر
بايعِنى زى أحبابى
